Kon mi por sa ku loke bo ta bisa ta kuadra?

Seis argumento ku ta mustra konfiabilidat di Beibel

Tokante historia di Beibel

Tin masha hopi manuskrito bieu di Beibel. Di Plato tin solamente shete kopia. E di promé ta datá 1200 aña despues di su morto. Tòg niun hende no ta duda ku ta di Plato e ta. Tin 5.700 manuskrito di tèstamènt nobo di kua esun di mas bieu ta datá 40 aña despues di Hesus Su morto. Estudionan ta mustra ku e teksto a kambia masha tiki (<1%) durante añanan, di moda ku e kambionan no ta mustra di ta relevante (ortografia, sekuensia di palabra). Si e Tèstamènt Nobo no ta konfiabel, e ora ei ningun teksto históriko no ta konfiabel.

Arkeólogonan a haña e ròlnan di Laman Morto, den nan diferente ròl di buki di kua algun ta datá te ku 200 aña promé ku Kristu. E buki di Beibel Isaias a ser hañá kasi kompleto i idéntiko na loke nos konosé, loke ta mustra ku e teksto no a kambia dor di kopia. E ròl di Isaias a wòrdu investigá na Universidat di Reino na Groningen (Hulanda) intensivamente, meskos ku tur otro buki ta wòrdu investigá.

Kumplimentu di profesia

E lista di profesia den Beibel ku ya a wòrdu kumplí ta masha largu mes. Mi ta bai pone mi enfoke awor riba esunnan ku bo mes por kontrolá si nan a kumpli kaba.

Den Ezekiel 36 i 37 ta wòrdu papiá tokante restourashon di e nashon Israel. Pa 1800 aña e nòmber Israel a disparsé for di tera. Den historia nunka a yega di sosodé ku un pueblo desterá ta haña un propio tera bèk, manera a pasa ku Israel na 1948. Un profesia ku no a kumpli ainda ta esun di Joel 3:2, kaminda ta pará ku e pais lo wòrdu dividí. Regularmente bo ta tende den notisia tokante e solushon di dos estado. Si nan sigui ku e kos aki, e profesia aki tambe lo ta kumplí.

Profetanan di Dios a profetisá tokante kaida di hopi pais, manera Ammon, Moab, Filistea i tambe siudatnan manera Babilonia (e siudat aki lo wòrdu rekonstruí atrobe durante e último tempunan), Ninive, Tirus i Sidon. Ningun di e siudatnan aki no ta eksistí mas awendia. Den Beibel ta pará skirbí ku lo bini un momento ku lo bo no por kumpra ni bende si bo no tin un marka riba bo man drechi o riba bo frenta. E kos aki a wòrdu pronostiká 2000 aña pasá, un tempu ku hende no por a imahiná ta kon lo por a realisá esaki. Awendia ya nos por mira kaba ku hende por paga ku su man. Bo por imahiná bo ku si bo no aseptá sierto kondishonnan, nan ta blòkia bo kuenta di banko pues bo lo no por kumpra ni bende.

Un muestra hopi kla di eksistensia di Hesus ta ku kalendario ta basá riba Su nasementu. Si E no tabata E hende ku E ta bisa ku E ta, pues si E tabata un gañadó, e ora ei nan lo no a basa e kalendario riba Su nasementu tòg? Nos tur konosé e dianan di fiesta: Pasku, Bièrnè Santu, Pasku di resurekshon, Asenshon, Pentekòste, tur ta dianan ku ta pará pa akontesimentunan hopi importante den e bida di Hesus. Tur e momentonan aki ta wòrdu predisí den detaye den tèstamènt bieu.

Ya kaba hopi trempan den Beibel bo ta haña deskubrimentunan sientífiko

Bo tabata sa ku na mas o ménos 1840 Semmelweis a wòrdu chèrchá pasobra el a preskribí protokòl nobo pa higiena, manera laba man promé ku un parto? Despues a bin resultá ku hopi bida a wòrdu salbá dor di esaki i awendia ta mas ku lógiko ku ta hasi esaki. Míles di aña pasá Beibel a preskribí yen di lei di higiena pa e pueblo di Israel di moda ku nan espektativa di bida tabata mas ku dòbel mas haltu ku e pueblonan rondó di nan.

Beibel ta konta ku tin vaye den laman, promé ku hende por a sambuyá asina profundo o skèn (Salmo 18:15: e vayenan di laman a bira visibel). Henter e sirkulashon di awa ta wòrdu deskribí, loke ku hende por a demostrá hopi mas despues (Predikador 1:6,7). E buki “Siensia moderno den Beibel” ta yen di siensia ku tabata hopi adelantá pa su tempu, for di kua ta mustra e inteligensia i e sabiduria di e Kreador.

Beibel no ta pinta kos mas bunita ku e ta

Beibel ta deskribí e komportashon no muchu positivo di e disípulonan, pero tambe e humiliashon di Hesus. Mi no por pensa ningun motibu pa pinta nan asina negativo, ku no ta ku ta esei ta e bèrdat. Ta kustumber di hende pa laga kos negativo afó si bo kier “bende” algu i pone énfasis riba loke ta positivo. Algun ehèmpel ta:

• E disípulonan ta hui na momento ku nan ta kue Hesus prezu.
• Hesus Su famia ta deklar’é loko (Marko 3:21)
• Un multitut grandi ta haña Hesus Su palabranan duru na un dado momento i nan ta bai (Huan 6:66)
• E krusifikashon, loke ta un humiliashon grandi pa e lider di un movementu spiritual.
• E disípulonan ta muri pa e Evangelio.

Resistensia

Bo tabata sa ku na e momento aki tin 359 miyon di kristian ku ta wòrdu persiguí kruelmente pasobra nan ta kere den e Dios di Beibel? Si bo konosé Beibel anto lo bo sa ku e kontrinkante di mas grandi di Dios ta e diabel, ku ta hasi todo por todo pa por kaba ku kristianismo i pa pinta Dios pretu. Hesus mes ta bisa esaki kaba, E ta bisa: ‘Un esklabu no ta mas ku su shon.’ Si nan a pèrsiguíMi, boso tambe nan lo pèrsiguí’ (JUA 15:20)

Bidanan ta kambia

Ounke ku bo no ta wòri ku e pruebanan pafó di Beibel, bo por opservá e pruebanan interno di un bida kambiá. Hende ta kambia ora nan aseptá Hesus komo nan Salbador! Esaki ta prueba ku Dios ta hasi loke ku E ta primintí den Su palabra i ku esun ku ta kere den djE a bira un kreashon nobo dor di fe.

“Pesei, si un hende ta den Cristo, ta un kriatura nobo e ta; e kosnan bieu a pasa kaba; ata, tur kos a bira nobo” (2KO 5:17)