Kiko ta bai pasa presísamente?

Loke Beibel ta pronostiká tokante final di tempu

E liña di tempu di e 7 aña di Tribulashon

Beibel, prinsipalmente e buki di Revelashon, ta konta hopi kos tokante e último tempu partikularmente tokante e Tribulashon. Akibou bo ta haña un resúmen kòrtiku di loke Beibel ta bisa tokante e tempu aki.

E temporada di awor

E Último tempu ta wòrdu repartí den diferente fase. Promé lo bai tin oumento di guera, teremoto, hamber, malesanan kontagioso, lo tin señalnan masha partikular den shelu, i hendenan lo ta masha yen di nan mes. Tambe ta pará skirbí den Beibel ku Damasko lo wòrdu destruí den un dia. Nos ta mira ku diariamente tin bataya na Damasko, ku armanan nuklear e destrukshon den 1 dia aki no ta imposibel. Beibel ta nombra diferente pais ku lo hunga un papel den e último tempu, manera Rusia, China i Iran.

E rapto di e hendenan ku ta kere den Kristu (e iglesia)

Dor ku e mayoria di humanidat a bira lomba pa Dios i e kana di piká a yena, ta bini shete aña di huisio di Dios. Promé ku e tempu aki yega, Dios ta tuma e hendenan ku a kere den djE den shelu, pasobra El a bisa ku Su rabia lo no baha riba e iglesia. Promé lo tin e resurekshon di esnan ku a kere den Kristu, e hendenan aki lo wòrdu tumá den shelu huntu ku e kristiannan ku ta na mundu e momento ei. Pues e ora ei miyones di hende lo disparsé. Kasi sigur e media lo bisa ku ta ekstraterestre a sekuestrá nan. Awendia bo ta skucha mas i mas den notisia tokante ufo i ekstraterestre di moda ku esaki lo ta un bon kos ku nan por uza pa splika e desaparishon aki.

E 7 añanan di Tribulashon

Un lider mundial lo lanta den e promé tres aña i mei for di un époka di 10 rei/reino. Tres di e diesnan aki lo kai i e shete otro rei/reinonan lo entregá nan poder na e lider mundial aki, Beibel ta yam’é e anti Kristu. E lo sera un pakto ku Israel i trasladá su gobièrno pa Israel. Un tèmpel nobo tambe lo wòrdu edifiká. E lider mundial, e anti-kristu lo laga mira su kara berdadero despues di tres aña i mei i e lo kier wòrdu adorá komo dios. Lo bini un estatua grandi di dje riba e plenchi di tèmpel na Jerusalem, ku lo kuminsá papia tambe na un dado momento.

Lo bin un momento durante di e tribulashon ku bo por tuma e marka di e bestia. Un marka riba bo frenta o riba bo man drechi. Beibel ta yama e sifra di e marka aki 666. Si bo tuma e marka aki bo ta hasi bo mes parti di e reino di satanas, bo ta yama e rabia di Dios riba bo i e ora ei salbashon lo no ta posibel mas. Sin e marka bo no por kumpra ni bende, pues ta bai bira hopi difísil pa por sigui funshoná den e komunidat.

 

Resúmen di Dios Su Huisio den e 7 añanan di Tribulashon
Dor ku e kana di piká lo a yega na un punto ku el a yena, Dios lo ehekutá Su huisio riba e mundu. E desasternan lo bira mas intensivo den e 7 añanan aki, ku un klimax den e segundo 3,5 añanan, ku Beibel ta yama e Gran Tribulashon.

Durante e tres aña i mei aki e humanidat lo bira mas sin amor i mas violento. Kuminda lo bira mas skars. Un kuarto parti di humanidat lo muri a kousa di guera, hamber, plaga i bestianan feros. Lo bai tin un teremoto gigante ku lo kue henter e planeta. Montañanan i islanan lo move for di nan lugá, pidanan grandi di piedranan kósmiko lo kai riba tera. A kousa di esaki sunami i aktividatnan volkániko lo kuminsá. Kandela lo yobe riba tera di moda ku lo tin kandela tur kaminda. Bientunan lo wòrdu lagá lòs ku lo sker serunan i kibra barankanan na pida. Despues di e promé tres aña i mei aki, 60% di e poblashon di mundu lo ta na bida.

Despues di esaki lo sigui un serie nobo di huisio. Lo bai tin áwaseru di kandela, meteorit lo kai di moda ku un tersera parti di tur laman di mundu lo kambia den sanger. Lo bin un sunami masha grandi, di moda ku un tersera parti di tur barku lo kaba na nada, un tersera parti di tur fuente di awa lo wòrdu venená, i e solo, luna i streanan lo bira skur.

Un kapítulo den e buki di Revelashon ku ta duna bo kalafriu, ta papia di dalakochinan diabóliko ku lo tormentá hende na mundu pa lunanan largu di moda ku nan lo buska morto pero lo no por hañ’e. E demoñonan aki lo no hasi e hendenan ku bin na fe nada, pasobra Dios ta protehá nan.

Despues di esaki lo bini un serie nobo di huisio. 1. E hendenan ku tin e marka di e bestia lo haña tumornan maligno. 2. Laman lo kambia den sanger i tur bida den laman lo muri. 3. Riunan i fuentenan di awa tambe lo kambia den sanger. 4. Lo tin kalor ekstremo. 5. Lo tin skuridat total den e reino di e anti-kristu. 6. E riu Eufrates lo seka. 7. Lo bini un teremoto nunka bisto, e siudat Babilonia (posiblemente Roma, un parti grandi di e reino di e anti-kristu) lo kai for di otro den tres pida, algun otro siudat lo kai den otro i sierto serunan lo bo no por mira mas. Piedranan di hagel di mas o ménos 26 kilo lo kai for di shelu. Despues di e huisionan aki lo no por papia mas di un komunidat strukturá. Suministro di koriente, transporte públiko, bankonan etc. kasi lo no funshoná mas.

E anti-kristu lo prepará su mes na final di e 7 añanan aki ku un ehérsito grandi pa hasi guera kontra Israel. Lo bai tin un teremoto grandi i Hesus lo bini bèk físikamente riba e seru di Oleifi na Jerusalem. E lo mata e anti-kristu ku e rosea di Su boka i e milenio (1000 aña) di e reino di pas ta kuminsá.

E reino di pas di 1000 aña

Despues di shete aña di miseria lo bini 1000 aña di pas riba mundu, kaminda Hesu-Kristu lo dirigí e mundu for di Jerusalem. Lo bai tin kondishonnan paradísiko, bestianan ku ta kome karni lo kome yerba, e lamchi lo por biba huntu ku e leon. Na komienso di e temporada aki e kreyentenan ku a muri durante di e tribulashon lo lanta bèk pa reina huntu ku Hesus i Su iglesia. Señor Hesus lo huzga e pueblonan na komienso di e 1000 añanan aki, kaminda ku E, komo rei, lo kaba ku tur e enemigunan di Israel.

E diabel lo wòrdu lagá lòs atrobe na final di e reino di pas i e lo purba sedusí hopi hende pa bringa kontra Jerusalem. E lo pèrdè e bataya aki pasobra Señor Hesus lo trese un final na e sedukshon di diabel i lo tir’é pa semper den e lago di kandela.
 

E eternidat

Tur hende ku a yega di biba lo mester para dilanti di e trono di Dios un dia. Einan nos tur lo wòrdu huzgá pa loke nos a hasi, sea bon o malu. Lo bai tin dos destinashon eterno; shelu pa esnan ku a aseptá Kristu i fièrnu pa esnan ku a rechasá Kristu i a aktua kontra di nan konsenshi. Mi por imahiná ku e kosnan aki ta kai poko duru, pero mi kier pidi bo pa bo investigá nan. Dios ta un Dios bibu, pidiÉ
pa E laga bo mira e bèrdat. PidiÉ pa E guia bo ora bo ta lesa Beibel. E ta laga hañ’É. Dios tabata stima bo kaba promé ku bo a nase i E kier un relashon ku bo. Dios lo haña horibel si bo no aseptá su salbashon i bo bai pèrdí pa eternidat. E kier pasa eternidat huntu ku bo, di moda ku lo bo ta felis pa semper.

 

Konsehonan pa e 7 aña di tribulashon

Pidi Dios guia

Dios ta skucha bo semper, si bo papia den bo mes o bo papia duru. Pone bo konfiansa den djE. E kier yuda bo den e tempu aki i duna bo forsa. Bo mester djis pidiÉ.

Lesa Beibel

Dios ta papia pa medio di Beibel, esaki no ta simplemente un buki, pero e “buki bibu”. Pa medio di esaki Dios kier guia bo i siña bo atraves di Su Spiritu Santu. Den e último buki di Beibel, Revelashon, tin hopi kos skirbí tokante tribulashon.

Konta otronan tokante Dios Su plan di salbashon

Dios no kier pa niun hende bai pèrdí, pero pa tur hende wòrdu salbá. E kier uza bo pa konta otro hende ku nan por wòrdu salbá dor di kere den Señor Hesus.

No tuma e marka di e bestia

Si bo tuma e marka di e bestia, bo ta skohe pa e reino di satanas. Hesus ta bisa ”I no tene miedu di esnan ku ta mata e kurpa, ma ku no por mata e alma; ma mas bien tene miedu di Esun ku por destruí tantu alma komo kurpa den fièrnu”(MATEO 10:28). Esaki no ta Dios Su boluntat, pero ku esaki Hesus kier mustra ku tin hopi mas kos na peliger ku solamente nos bida presente. Bo por haña mas tokante e marka aki den e promé parti di e Tribulashon.

Sea konsistente i mantené bo bista riba eternidat

Den Beibel ta trata hopi biaha tokante perseveransia. E bida di un kristian hopi biaha no ta fásil, hopi kristian a sufri a kousa di nan kreensia. Pero dor di keda konfia riba Dios i obedes’É nos por vense huntu kunÉ. Komo yu di Dios no ta eksistí sufrimentu pornada, E sufrimentu riba e mundu aki lo sòru pa mas gloria den e mundu benidero.

Den Romanonan 8:17, 18 ta pará: i si nos ta yu, nos ta eredero tambe, eredero di Dios i ko-eredero ku Cristo, si di bèrdat nos ta sufri huntu kunE, pa nos wòrdu glorifiká tambe huntu kunE. Pasobra mi ta konsiderá ku e sufrimentunan di e tempu presente aki no ta digno di wòrdu kompará ku e gloria ku lo wòrdu revelá na nos.