Loke mi kier spièrta bo p’e ta algu ku por zona hopi straño, kisas na promé instante difísil pa kere.
Pero tòg lo mi kier konta bo. Pasobra tin hopi kos ta pasando i mi ta pensa ku bo ta den un peliger grandi. Mi ta haña un tiki difísil pa kompartí e kos aki ku bo, pasobra mi sa ku e ta bai zona manera un kuenta. Pero pasobra mi ta sigur di tur e kosnan aki, lo tabata kruel si mi lo no a bisa nada. Ok bon ban kuminsá.
Si bo no kier sigui lesa lo mi por a pidi bo algu? Print e pdf aki bou i ward’é. Si bo ripará despues ku tòg e ta bèrdat, e ora ei bo sa kiko ta pasando i kiko bo mester hasi.
Kua ta e peliger anto?
Beibel ta pronostiká e temporada ku nos ta biba aden i loke ta bai pasa den detaye.
Un gran parti di Beibel ta profesia. Profesia ta loke Dios ta konta ku ta bai pasa den futuro. Loke ku ta pasando den mundu awor ta kana presis riba e skema ku nos ta lesa den Beibel tokante esaki. Tin hopi profesia den Beibel ku ya a wòrdu kumplí. Tin sierto profesianan ku a sosodé asina presis i literal ku nan kier bisa ku ta despues el a wòrdu skirbí. Pero esaki ta demostrá muchu mas ku e Dios di Beibel ta omnisiente, E sa tur kos. Tin profesianan den Beibel ku no a sali ainda. Mi kier konta mas di nan, lo bo bai ripará den e añanan ku ta bini si e kos aki ta konfiabel si o nò.
Kiko ta biniendo? E 7 añanan di tribulashon
Beibel ta deskribí e tempu ku nos ta bibando aki komo e último tempu. Esei ta un periodo kaminda amor di hende ta fria i hende ta konsentrá riba nan mes. Hopi hende lo wòrdu engañá fásilmente, lo tin hopi guera, i rumornan di guera, hamber, malesanan kontagioso, teremoto, desasternan natural masha straño, persekushon i libertinahe.
Beibel ta deskribí e último 7 añanan di mundu komo e temporada di mas horibel ku a yega di eksistí riba mundu. Lo bai tin un hende ku lo reina riba mundu, lo tin un sistema di pago mundial kompletamente kontrolá, personanan ku no ta partisipá na e sistema aki no por kumpra ni bende mas. Lo bai tin desasternan horibel i 90% di e poblashon mundial lo muri.
Kiko mi tin ku hasi pa mi por skapa di e 7 añanan horibel aki?
Tur hende ku ta kere den Señor Hesu-Kristu i ku ta konfia riba djE ( yamá “e iglesia di Kristu” den Beibel) lo keda di spar for di e tempu pisá aki. Promé ku e 7 añanan aki Señor Hesus lo tuma su iglesia bai kuné den shelu. Esaki ta wòrdu yamá rapto. Diripiente miyones di kristian lo desaparesé. Esaki lo trese un káos i un pániko grandi, i kisas lo tin spekulashon ku ta ekstraterestre a bai ku e hendenan. Kua splikashon ku nan bini kuné den e tempu ei, no kere! Ta mentira.
Tin solamente un manera pa por skapa di e opreshon aki na mundu. Un manera pa bo no tin nodi di pasa den e huisio eterno di Dios pa bo pikánan i pa bo ta felis pa semper. Lesa mas tokante esaki bou di “Kon mi por wòrdu salbá”.
Kon mi por sa si punto 1/3 ta kuadra?
E manera mas bisto pa bo por haña sa ta ora ku bo ripará ku masha hopi hende a disparsé for di mundu. I ora bo mira despues ku loke Beibel ta bisa tokante e shete añanan aki ta sosodiendo. Mi no tin e espektativa ku hopi hende lo kere mi den prinsipio, pero hustamente pasobra e desaparishon diripiente di asina tantu hende lo ta asina bisto, mi ta kere ku e ora ei si lo bo ta habrí pa loke mi ta bisa. Beibel ta bisa tambe ku hopi hende lo yega na fe den e shete añanan aki.
Kiko awor si mi haña sa ku loke bo ta skirbi ta bèrdat te despues di e rapto?
Lo bo no por skapa mas di e tempu pisá aki. Pero bo por kombertí na Dios i pone bo konfiansa den Su yu Kristu Hesus. Asina bo por wòrdu salbá pa eternidat. E ta zona duru, pero Beibel ta papia tokante fièrnu, kaminda hende lo keda pa eternidat si nan no kere den Dios i shelu, e lugá kaminda e hendenan ku a aseptá Hesus komo nan salbador lo ta felis pa semper.
Mi kier rogá bo pa bo kombertí i bira kara pa Dios, pasobra mundu lo ta kompletamente diferente despues di rapto. Lo bai ta hopi mas difísil ku awor pa haña e bèrdat. Esaki ta un asuntu hopi serio, pidi pordon pa bo pikánan awe, kere den Hesus i siguiÉ.
E peliger di mas grandi no ta sintá den mañan, pero den awe!
Bo a wòrdu spièrtá pa un tempu horibel ku lo bai bin. Pero tin menasa di un peliger hopi mas grandi. Bo tabata sa ku kada 24 ora mas ku 160.000 hende ta muri? Beibel ta siña ku nos ta wòrdu huzgá despues di morto. E ora ei nos tin ku para dilanti di un Dios santu i hustu i E ta huzga nos segun su kriterio, no segun nos kriterio i p’esei E lo mester deklará nos kulpabel.
Pasobra Dios ta stima hende asina tantu, ku El a manda Su yu Kristu Hesus na mundu pa E paga pa piká pa medio di Su sufrimentu. E kier karga bo kastigu i E ta ofresé bo pordon i bida eterno, pero solamente si bo aseptá Su oferta. Bo por lesa mas tokante esaki bou di “Kon mi por wòrdu salbá”.
Kon mi por wòrdu salbá?
Rekonosé ku bo ta un pekador.
Bo ta un bon hende? Kasi sigur bo lo kontestá ku “si” i bo no ta komprondé pakiko lo bo mester wòrdu salbá. Bo bon obranan no por kita bo kosnan malu ku bo ta hasi. Un hues hustu no por laga un asesino bai liber pasobra e ta un bon tata. Dios a pone su leinan den nos kurason i den nos konsenshi. Manera: no gaña , no hòrta, no uza Dios su nòmber sin tin mester, no kòrta orea (ni den pensamentu). Ora bo sa ku bo por hasi algu bon anto bo ta keda sin hasié tambe ta piká. Kuantu biaha kaba bo no a kibra e mandamentunan aki? Si bo mira bo mes awor segun e standart perfekto di Dios lo bo yama bo mes un bon hende ainda? Ami, lamentablemente ku nò.
Pero Dios ta amor, E no por laga e ko’i pasá? Si, Dios ta amor, pero E ta santu i hustu, 100% hustu. Dios Su mandamentunan no ta pa huzga bo. Pero pa laga bo mira ku bo ta kulpabel i ku bo mester di un Salbador ku por karga bo pikánan.
Pidi pordon pa bo pikánan i tuma Hesus komo bo Salbador.
Si un hues ta sera su wowonan pa inhustisia, e ta korupto i e mes lo mester wòrdu kastigá. Dios ta totalmente santu i hustu i p’esei E no por laga niun piká sin kastigu. Dor ku nos no ta sin piká, E lo mester huzga nos tambe. Den Beibel ta pará ku e konsekuensia di piká ta morto. Pero Dios Su amor pa nos ta asina grandi ku El a manda Su propio yu na mundu pa karga e kastigu pa nos, pa medio di Su sufrimentu i Su morto na e krus.
Dios ta pidi solamente pa kere den Su yu pa por wòrdu salbá di e kastigu ku nos ta meresé. Den Juan 3:16 ta pará: “Pasobra Dios a stima mundu asina tantu, ku El a duna Su Yu unigénito, pa ken ku kere den djE no bai pèrdí, ma tin bida etèrno”
Si bo duna bo bida na Señor Hesus, Spiritu Santu ku ta wòrdu yamá tambe e Konsolador lo bin biba den bo. E ta konvensé nos di piká i ta laga nos mira e kaminda ku ta hiba na Hesus. E ta guia bo i duna bo forsa pa perseverá den sirkunstansianan difísil.
Bira lomba pa piká, siña konosé Dios pa medio di Beibel i konfia riba djE.
Bo por siña konosé Dios dor di lesa Beibel i papia ku Dios mes pa medio di orashon, E kier un relashon ku bo. Beibel ta bisa nos tambe ku fe sin bon obra ta un fe morto. E bon obranan ta bini dor di gratitut i amor, e ta bai di mes ora bo eksperensiá Dios Su amor.
Bo ta bira un yu di Dios, si bo aseptá Señor Hesus komo bo Salbador. Esei no kiermen ku bida lo bai bira mas fásil, pero E lo ta huntu ku bo ku Su poder, pas i amor. A kousa di esaki lo bo bira lomba pa bo piká i biba pa medio di Su amor. Un pas i un amor ku no ta di e mundu aki i ku bo no por splika. Bo por eksperensi’é solamente dor di duna bo bida na Kristu. E ora ei E lo sigui guia bo den bida. E lo ta semper ku bo i E lo no bandoná bo.